شكشوكة

  • سهلة
  • 30دق
  • 2 أشخاص
  • مالح

وصفة المرة هذي تونسية ميا بالميا. شكشوكة محرحرة ومدللة بكعابر اللحم. بما انو مانعيشش في تونس، المرڨاز عملة صعبة. عاد قلت نفوح اللحم كيما المرڨاز، ونكعبرو بالطول شوية. ما يخفاش عليكم عاد بنة الهريسة العربي إلي ما تغيب على طعام تونسي فاوح وبنين.

الوصفة

  • 250 غ لحم مفروم
  • 2 مغارف كبار زيت زيتونة
  • 1 بصل كبيرة
  • 3 إلى 4 سنون ثوم
  • 1 مغرفة كبيرة معجون طماطم
  • 1 فلفل أخضر كبير
  • 2 طماطم متوسطة
  • 1 أو 2 فلفل حار (حسب الرغبة)
  • 4 عظمات
  • هريسة، بسباس كعب، تابل، كروية مرحية، فلفل زينة، ملح وفلفل أكحل
  • بصل ومعدنوس مفرومين للزينة
  • فوح اللحم المفروم بالبسباس والتابل وفلفل زينة وملح وفلفل أكحل. شكل كعابر صغار.
  • أفرم البصل والثوم وقليهم في الزيت في قلاية كبيرة.
  • قلي كرات اللحم ومعجون الطماطم.
  • امرق بكاس ماء وفوح الصوص بالهريسة والتابل والكروية المرحية وفلفل زينة وملح وفلفل أكحل.
  • خلي الصوص تغلي لمدة 10 إلى 15 دقيقة على نار متوسطة.
  • قطع الفلفل والطماطم وزيدهم للصوص. خليهم يزيدوا يغليو لمدة 5 إلى 10 دقايق. زيد الماء إذا تحسها نشحت.
  • زيد العظمات و نقص شوية في النار.
  • كي تحضر الشكشوكة، زينها مالفوق بالمعدنوس والبصل.
صحة وبالشفاء!