رفيسة ميّو
الرفيسة وصفة تونسية، عبارة على خبز مورق، مفتفت، مسقي بالحليب والزبدة والسكر ويتقدم مع الدقلة.
الرفيسة ماكلة زمنية نطيبوها إحتفالاً بدخول ميّو و إنطلاق موسم الحصاد، شهر ميّو هو خامس شهر في العام العجمي، و يوافق نهار 14 ماي.
الوصفة
- خلط السميد والملح والزيت مع بعضهم لين السميد يتبل الكل.
- زيد الماء الدافي تدريجياً وإنت تعجن. العجينة لازم تكون طرية وما تتلصقش برشة.
- اعركها لمدة 10 دقايق.
- غطي العجينة بمنديلة نظيفة ومندية شوية وخليها ترتاح لمدة نصف ساعة على الأقل.
- قسم العجينة الى 6 أو 7 كرات بأحجام متساوية.
- ما تدهنش يديك بالزيت وما تدهنش الطاولة إلي تخدم عليها بالزيت.
- حل العجينة بالقلقال لين تولي رهيفة.
- ادهن العجينة بالسمن أو الزبدة من بعد اطويها على بعضها في إتجاه الطول ثم العرض بش تتحصل على شكل مربع.
- حط مربع العجينة على جنب وغطيه وعاود نفس المراحل مع بقية العجينة.
- سخن الطاجين وإلا القلاية على نار متوسطة.
- فطر مربع العجينة بيدك لين يولي علوه نصف سنتيمتر تقريباً.
- حط الفطيرة تطيب على الوجهين.
- دوب تطيب، وهي مازلت سخونة، قصها بيدك وحاول نحيلها أوراقها من بعضهم.
- فتفت الأوراق طروف صغار (في كبر كعبة زبيب أو أصغر). فما شكون يحبها زادت مقصوصة بالمقص. المرحلة هذي تكون أسهل كي تبدى الفطيرة مازالت سخونة.
- عوض نفس المراحل مع بقية الفطيرات.
- غربل الرفيسة المفتفتة في غربال خشين.
- غلي الحليب وذوب فيه السكر من بعد صبه فوق الرفيسة وخلط لين يتشرب الكله.
- زيد الدڨلة المقصوقصة والزبدة الذايبة وخلط مليح.
- قدمها دافية..