براليني

البراليني مكون أساسي في برشة حلويات وخاصةً الفرنسية، و نستعملوه في تحضير الكيك والكريمة والشكلاطة.

إذا تحب لونه غامق، حمر البوفريوة واللوز وخليهم بقشورهم. البراليني يصبر لمدة أشهر إذا تحطه في حكة تتسكر مليح وتخبيه في الفرجيدار.

الوصفة

• حمّر اللوز والبوفريوة في الفرن المسخن مسبقاً على درجة 160°C لمدة 10 دقايق.
• حط السكر والماء في كسرونة كبيرة وخليهم على نار متوسطة لين يغليو.
• خلي الخليط يغلي شوية لمدة 2 دقايق وزيد البفريوة واللوز المحمرين.
• خلط مليح.
• البوفريوة واللوز بش يتغطاو بطبقة بيضاء.
• كمل خلط بالشوية حتى لين السكر يرجع يذوب ويولي كرمال.
• وقتلي البوفريوة واللوز يتغطاو بالكرمال، صبهم طول فوق ورق الفرن وخليهم يبردو.
• كسر الخليط وارحيه في mixeur.
• عملية الرحيان تستغرق برشة وقت حسب نوعية الmixeur. المفيد لازم تتحصل على خليط جاري شوية وأرطب.
• البرالين حضر. حطوا في حكة بلار تتسكر مليح وخبيه في الثلاجة.

صحة وبالشفاء!