خبزة البرتقال

  • سهلة
  • 1س 15
  • 8 أشخاص
  • حلو

فصل البرتقال مازال وياحبذا نستغلو الفرصة ونعملو حويجة حلوة للويكند.
المرة هذي نقترح عليكم خبزة البرتقال. خفيفة وبنينة وساهلة، تحليلكم القعيدة في هالشتوية.
أنا متأكدة إلي باش تعجبكم كيف تجربوها.

الوصفة

  • 3 كيسان فارينة
  • 1 كاس سكر
  • 1 كاس زيت نباتي
  • 1 كاس عصير برتقالة
  • 1 مغرفة كبيرة قشرة برتقال
  • 4 عضمات (الأبيض وحدو و الأصفر وحدو)
  • 2 مغارف صغار خميرة مرطبات
  • شرائح برتقال للزينة (إختياري)
  • 160°C
  • 1 ساعة.
  • اركض أبيض العضم لين يولي كتلة ثلجية.
  • أركض أصفر العضم مع السكر حتى يولي الخليط مستبيض. ثم زيد عليهم بقية المكونات.
  • خلط أبيض العضمة مع الخليط بالشوية باش يبقى الهواء في الخبزة.
  • زين الخبزة بشرائح البرتقال و ذر عليهم شوية سكر.
  • طيب الخبزة في حرارة 160° لمدة ساعة تقريباً. ديمة تأكد من الطياب بإستعمال سكينة تغرسها. إذا خرجت شايحة راهي طابت.

ملاحظة: أنا من محبي القوارص والكيكة هذي نموت عليها لدرجة اني نحط فيها برشة قشور برتقال. ناخو قشرة البرتقال ونحي منها القشرة البيضة. من بعد نقصهم طروف جويدين. ما نحكيلكمش قداه نعمل كيف على تڤرميشة القشرة في وسط الكيكة…

صحة وبالشفا!