البرزقان كسكسي حلو بالزعفران، أصله من باجة، شمال غرب تونس، يتقدم مع لحم العلوش والفاكية والدقلة.

برشة يخلطوا بين البِرزقان الباجي (بكسر الباء) والبُرزقان الكافي (بضم الباء)، إلي ممكن يتشبهوا في المظهر لكن يختلفوا في طريقة التحضير وخاصة الطعم.

برزقان

الوصفة

برزقان

  • غلي الزعفران مع كاس ماء أو أكثر في كسرونة.
  • حط اللحم في المقفول وقليه مع م.ك. زيت زيتونة و 50 غ من الزبدة.
  • صفي ماء الزعفران وزيده (هنا نحكي على ماء الزعفران) للحم مع رشة ملح وفلفل أكحل.
  • زيد ماء سخون، ما يكفي باش اللحم يتغم بكله.
  • وقتلي المرقة تبدى تغلي، حط الكسكسي يتفور مع عود قرفة.
  • فور لمدة 30 إلى 45 دقيقة.
  • بعد ما تكمل التفويرة الأولى، بثبث الكسكسي بشوية مالمرقة ورجعوا يتفور 30 إلى 45 دقيقة اخرين.
  • مدة التفويرة مرتبطة بنوعية وخشن الكسكسي.
  • وقتلي تعرف إلي العلوش طاب، زيد السكر للمرقة وخليها تغلي لمدة 10 دقايق.
  • خرج اللحم.
  • زيد الحليب للمرقة وخليها تغلي 5 دقايق على الأقل.
  • الكسكسي تفور وحضر، نحي عود القرفة وحطه في صحفة كبيرة وزيده بقية الزبدة مقصوصة مكعبات (200 غ) وخليت مليح لين تذوب كلها في الكسكسي.
  • سقي الكسكسي بالمرقة. مش بالضرورة تستعمل المرقة الكل. المفيد يكون الكسكسي راوي.
  • البرزقان حضر. قدمه مع اللحم و الفاكية المحمرة المهروشة، والدقلة.
برزقان

صحة وبالشفاء!